లైంగిక దాడి కేసులో ప్రధాన నిందితుడిగా ఉన్న అధికారి

సుప్రీంకోర్టులో ముందస్తు బెయిల్ పిటిషన్ తిరస్కరణ

కొన్ని రోజుల క్రితమే సర్వీసు నుంచి శాశ్వత తొలగింపు

లైంగిక దాడి ఆరోపణలతో తీవ్ర విమర్శలు ఎదుర్కొంటున్న వినుకొండ మాజీ సర్కిల్ ఇన్‌స్పెక్టర్ (సీఐ) చిన్నా మల్లయ్య ఎట్టకేలకు పోలీసుల ఎదుట లొంగిపోయారు. పరారీలో ఉన్న ఆయన శుక్రవారం రాత్రి వినుకొండ పోలీస్ స్టేషన్‌లో లొంగిపోయినట్లు అధికారులు ధ్రువీకరించారు. ఈ కేసు నమోదైన నాటి నుంచి ఆయన పోలీసులకు చిక్కకుండా తప్పించుకు తిరుగుతున్న విషయం విదితమే.

వినుకొండ మండలం బ్రాహ్మణపల్లి గ్రామానికి చెందిన ఓ మహిళ, తనపై సీఐ చిన్నా మల్లయ్య లైంగిక దాడికి పాల్పడ్డారంటూ 2024 ఏప్రిల్ 29న ఫిర్యాదు చేశారు. ఈ ఫిర్యాదు ఆధారంగా వినుకొండ పోలీసులు కేసు నమోదు చేసి దర్యాప్తు చేపట్టారు. విధి నిర్వహణలో నిర్లక్ష్యం వహించిన ఆరోపణలతో అప్పటికే వీఆర్‌లో ఉన్న మల్లయ్యను, ఈ కేసు నేపథ్యంలో ఉన్నతాధికారులు సస్పెండ్ చేశారు.

అరెస్టు నుంచి తప్పించుకునేందుకు ఆయన హైకోర్టు, సుప్రీంకోర్టులలో ముందస్తు బెయిల్ కోసం ఆశ్రయించారు. అయితే, ఆయన పిటిషన్లను ఉభయ కోర్టులు తిరస్కరించాయి. బుధవారం సుప్రీంకోర్టులో బెయిల్ పిటిషన్ కొట్టివేతకు గురైన వెంటనే, గుంటూరు రేంజ్ ఐజీ సర్వశ్రేష్ఠ్ త్రిపాఠి ఆయనను సర్వీసు నుంచి శాశ్వతంగా తొలగిస్తూ (డిస్మిస్) ఉత్తర్వులు జారీ చేశారు.

కాగా, గురువారం మారువేషంలో వినుకొండ కోర్టు ప్రాంగణానికి వచ్చిన మల్లయ్య, న్యాయమూర్తి సెలవులో ఉన్నారని తెలుసుకొని వెనుదిరిగినట్లు సమాచారం. ఈ విషయం తెలుసుకున్న పోలీసులు అప్రమత్తమైనప్పటికీ ఆయన వారి కళ్లుగప్పి తప్పించుకున్నారు. చివరకు న్యాయపరమైన అన్ని దారులు మూసుకుపోవడంతో ఆయన పోలీసులకు లొంగిపోయారు. మల్లయ్య లొంగుబాటుతో పోలీసులు తదుపరి చట్టపరమైన చర్యలు ప్రారంభించారు. ఈ ఉదంతం పల్నాడు జిల్లాలో తీవ్ర సంచలనం సృష్టించింది.                                

The post ఎట్టకేలకు లొంగిపోయిన మాజీ సీఐ చిన్నా మల్లయ్య appeared first on Bharat Aawaz - The Voice Of India! News, Updates, Politics and More!.