*గ్రామపంచాయతీ నిధులపై ప్రభుత్వ కీలక ఆదేశం: సర్పంచ్–ఉప సర్పంచ్ డబుల్ సంతకం తప్పనిసరి*
గ్రామపంచాయతీ నిధుల వినియోగంలో పారదర్శకత తీసుకురావాలనే లక్ష్యంతో ప్రభుత్వం కీలక ఆదేశాలు జారీ చేసింది. ఇకపై పంచాయతీ నిధులకు సంబంధించిన చెక్కులపై సర్పంచ్ మరియు ఉప సర్పంచ్ ఇద్దరి సంతకాలు తప్పనిసరిగా ఉండాలని స్పష్టం చేసింది. ఇద్దరి సంతకాలు లేకుండా చెక్కులను బ్యాంకులు చెల్లించరాదని ఆదేశాల్లో పేర్కొన్నారు.
పంచాయతీ నిధుల దుర్వినియోగాన్ని అరికట్టడం, పాలనలో జవాబుదారీతనాన్ని పెంచడం కోసమే ఈ నిర్ణయం తీసుకున్నట్టు ప్రభుత్వం తెలిపింది. గ్రామస్థాయిలో నిధుల వినియోగంపై తరచుగా వస్తున్న ఆరోపణల నేపథ్యంలో ఈ మార్పులు తీసుకొచ్చినట్టు అధికారులు వివరించారు.
ఈ నిబంధనను కచ్చితంగా అమలు అయ్యేలా అన్ని జిల్లాల కలెక్టర్లు, జిల్లా పంచాయతీ అధికారులు, సంబంధిత శాఖలు పర్యవేక్షణ చేపట్టాలని ప్రభుత్వం ఆదేశించింది. నిబంధనల ఉల్లంఘనకు పాల్పడితే కఠిన చర్యలు తీసుకుంటామని హెచ్చరించింది.
ఈ నిర్ణయంతో గ్రామపంచాయతీల్లో ఆర్థిక వ్యవహారాలపై నియంత్రణ పెరిగి, ప్రజల విశ్వాసం మరింత బలపడుతుందని ప్రభుత్వం ఆశాభావం వ్యక్తం చేసింది.
