గోదావరిఖని ఏసీపీ కార్యాలయంలో అంతర్జాతీయ మహిళా దినోత్సవాన్ని పురస్కరించుకుని మహిళా పోలీసులకు ఘన సన్మానం జరిగింది. ఏసీపీ ఎం. రమేష్ ముఖ్య అతిథిగా హాజరై, మహిళా సిబ్బందితో కలిసి వేడుకలు నిర్వహించారు.
ఈ సందర్భంగా ఆయన మాట్లాడుతూ.. శాంతిభద్రతల పరిరక్షణలో మహిళా పోలీసులు పురుషులతో సమానంగా రాణిస్తున్నారని కొనియాడారు. షీ టీమ్స్, కోర్టు డ్యూటీ, పెట్రోలింగ్ వంటి క్లిష్టమైన విధుల్లో మహిళల ప్రతిభ అమోఘమని ప్రశంసించారు.
గృహహింస బాధితులకు కౌన్సెలింగ్ ఇచ్చి వారి జీవితాల్లో వెలుగులు నింపడంలో మహిళా అధికారులు ముందున్నారని తెలిపారు. విధుల్లో అంకితభావం చాటుతున్న పలువురు ఎస్సైలు, కానిస్టేబుళ్లను శాలువాలతో సత్కరించి, వారికి ప్రభుత్వం అన్ని విధాలా అండగా ఉంటుందని భరోసా ఇచ్చారు. ఈ వేడుకలు మహిళా పోలీసుల్లో ఆత్మవిశ్వాసాన్ని పెంపొందించాయి.
