ఏపీలో ఈవీ విప్లవానికి బాటలు వేస్తూ ప్రభుత్వం తొలిదశలో 135 ఛార్జింగ్ కేంద్రాల ఏర్పాటుకు సిద్ధమైంది. కేంద్రం ఆమోదించిన ఈ ప్రాజెక్టు ద్వారా జాతీయ రహదారులపై ప్రయాణించే ఎలక్ట్రిక్ వాహనదారుల ఛార్జింగ్ కష్టాలు తీరనున్నాయి. నెడ్క్యాప్ ఆధ్వర్యంలో సుమారు 600 ఛార్జింగ్ పాయింట్లు అందుబాటులోకి రానున్నాయి.
ఒక్కో కేంద్రానికి రూ. 50 లక్షల చొప్పున వెచ్చించి, ఆగస్టు నాటికి పనులు పూర్తి చేయాలని అధికారులు యోచిస్తున్నారు. ఏటా రాష్ట్రంలో ఎలక్ట్రిక్ కార్లు, టూవీలర్ల విక్రయాలు పెరుగుతున్న నేపథ్యంలో ఈ నిర్ణయం తీసుకున్నారు. రెండో దశలో విశాఖ, విజయవాడ వంటి ప్రధాన నగరాల్లో మరో 100 కేంద్రాలను ఏర్పాటు చేయనున్నారు. ఇది పర్యావరణ హిత ఇంధన వాడకానికి పెద్దపీట వేయనుంది.
