తెలుగు రాష్ట్రాల మధ్య తెలుగు విశ్వవిద్యాలయ ఆస్తుల పంపకం చిచ్చు రేపింది. ఉమ్మడి వర్సిటీకి సంబంధించిన నిధుల వినియోగంపై ఏపీ వీసీకి తెలంగాణ వర్సిటీ అధికారులు లీగల్ నోటీసులు జారీ చేశారు.
విభజన చట్టం ప్రకారం ఆస్తుల పంపకం పూర్తి కాకముందే ఏపీ వర్సిటీ నిధులను మళ్లించడంపై తెలంగాణ తీవ్ర అభ్యంతరం వ్యక్తం చేస్తోంది. ఈ వివాదం ఇప్పుడు న్యాయస్థానం మెట్లు ఎక్కే అవకాశం కనిపిస్తోంది.
పదేళ్లు గడిచినా బాషాభివృద్ధికి నిలయమైన వర్సిటీల మధ్య ఇలాంటి వివాదాలు తలెత్తడంపై విద్యావేత్తలు ఆందోళన చెందుతున్నారు. ఇరు రాష్ట్రాల ప్రభుత్వాలు జోక్యం చేసుకుని ఈ సమస్యను సామరస్యంగా పరిష్కరించాలని కోరుతున్నారు. లేనిపక్షంలో తెలుగు భాషా పరిశోధనలు, విద్యార్థుల భవిష్యత్తుపై ప్రభావం చూపే ప్రమాదం ఉంది.
