ఈపీఎఫ్‌వో కొత్త రూల్స్ – ఉద్యోగులకు పెద్ద రిలీఫ్|

ఉద్యోగులు ఎదుర్కొంటున్న పీఎఫ్ బదిలీ ఇబ్బందులకు త్వరలో తెరపడనుంది. ఎంప్లాయీస్ ప్రావిడెంట్ ఫండ్ ఆర్గనైజేషన్ (EPFO) సరికొత్త ఆటోమేటిక్ ట్రాన్స్‌ఫర్ సిస్టమ్‌ను ప్రవేశపెట్టేందుకు సిద్ధమవుతోంది. ఈ వ్యవస్థను 2025 నాటికి పూర్తిగా అమలు చేయాలని అధికారులు నిర్ణయించారు.

ఇకపై ఉద్యోగం మారినప్పుడు పాత పీఎఫ్ డబ్బును కొత్త ఖాతాకు బదిలీ చేయడానికి ఎలాంటి ఫారమ్‌లు నింపాల్సిన అవసరం లేదు, లేదా నెలల తరబడి ఎదురుచూడాల్సిన అవసరం లేదు.

ఉద్యోగి కొత్త సంస్థలో చేరిన వెంటనే ఆయన పాత పీఎఫ్ బ్యాలెన్స్ ఆటోమేటిక్‌గా కొత్త యజమాని ఖాతాకు బదిలీ అవుతుంది. ఈ విధానం పూర్తిగా డిజిటల్ ప్రాసెస్పై ఆధారపడి ఉంటుంది. ఒకే యూఏఎన్ (UAN) నంబర్ ద్వారా ఉద్యోగుల అన్ని పీఎఫ్ వివరాలు అనుసంధానమవుతాయి. దీంతో ట్రాన్స్ఫర్ ఆలస్యం, డేటా పొరపాట్లు, డూప్లికేట్ ఖాతాల సమస్యలు తలెత్తవు.

ఈ నిర్ణయం ఉద్యోగులకు పెద్ద రిలీఫ్‌గా మారనుంది. EPFO ఈ వ్యవస్థను ప్రారంభించడంతో కోట్లాది సాలరీ ఉద్యోగులు తమ పీఎఫ్ డబ్బును సులభంగా, వేగంగా పొందే అవకాశం కలుగుతుంది.