ఆంధ్రప్రదేశ్ ఐటీ, విద్యాశాఖ మంత్రి నారా లోకేశ్, రాష్ట్రపతి ద్రౌపదీ ముర్ముతో మర్యాదపూర్వకంగా భేటీ అయ్యారు. విజయవాడ పర్యటనలో ఉన్న రాష్ట్రపతిని ఆయన నోవోటెల్ హోటల్‌లో కలిశారు.
విజయవాడ ఇంద్రకీలాద్రిపై జరుగుతున్న దసరా శరన్నవరాత్రి ఉత్సవాల్లో పాల్గొనడంతో పాటు, జాతీయ స్థాయిలో మహిళా స్వయం సహాయక బృందాల ఉత్పత్తుల కోసం ఏర్పాటు చేసిన ‘జాతీయ సరస్ మేళా’కు ముఖ్య అతిథిగా హాజరయ్యేందుకు నిన్న రాష్ట్రపతి నగరానికి విచ్చేశారు.
ఈ సందర్భంగా రాష్ట్రపతిని కలిసిన లోకేశ్, ఆమెకు స్వాగతం పలికి శాలువాతో సత్కరించారు. ఇంద్రకీలాద్రిపై దసరా ఉత్సవాల్లో పాల్గొనడానికి, మహిళా స్వయం సహాయక సంఘాల ఉత్పత్తులతో ఏర్పాటు చేసిన ‘సరస్ మేళా’లో పాలుపంచుకోవడానికి విజయవాడ వచ్చినందుకు రాష్ట్రపతికి లోకేశ్ ధన్యవాదాలు తెలిపారు.
ఈ సందర్భంగా, రాష్ట్రపతికి లోకేశ్ ప్రత్యేక కానుకలు అందజేశారు. రాష్ట్ర చేనేత కళకు, సాంస్కృతిక వైభవానికి ప్రతీకగా నిలిచే ప్రసిద్ధ మంగళగిరి చేనేత చీరను బహూకరించారు. దీంతో పాటు, తెలుగు కళాకారుల హస్తకళా నైపుణ్యానికి నిలువుటద్దం పట్టే ఏటికొప్పాక లక్క బొమ్మలను కూడా ఆయన రాష్ట్రపతికి బహుమతిగా ఇచ్చారు.
