ఆసిఫాబాద్ (భారత్ ఆవాజ్ న్యూస్): ఆదివాసీ సంప్రదాయాలు, సంస్కృతికి ప్రతీకగా నిలిచే దండారి గుస్సాడీ ఉత్సవాల్లో ఒక అరుదైన, అద్భుతమైన దృశ్యం ఆవిష్కృతమైంది. కొమరం భీం ఆసిఫాబాద్ జిల్లా తిర్యాణి మండలం దంతన్‌పల్లి గ్రామంలో నిర్వహించిన గుస్సాడీ ఉత్సవాల్లో జిల్లా కలెక్టర్ హరిత స్వయంగా పాల్గొన్నారు.
కేవలం ఉత్సవాలను తిలకించడమే కాకుండా, ఆదివాసీ సంస్కృతిని గౌరవిస్తూ ఆమె స్వయంగా ఆ నృత్యోత్సవంలో భాగమయ్యారు. స్థానిక గిరిజన కళాకారులతో కలిసి అడుగులు వేస్తూ గుస్సాడీ నృత్యం చేశారు. సంప్రదాయ కళలను ఆస్వాదిస్తూ, ఎంతో ఉత్సాహంగా సాగిన ఈ నృత్యంలో కలెక్టర్ సందడి చేయడం అక్కడ ఉన్నవారందరినీ ఎంతగానో ఆకట్టుకుంది.
తమతో కలిసి జిల్లా కలెక్టర్ అంతటి ఉన్నతాధికారి నృత్యం చేయడంతో గిరిజన గ్రామస్థులు మరియు కళాకారులు ఎంతో ఆనందం వ్యక్తం చేశారు. సంస్కృతిని కాపాడుకోవడంలో అధికారుల మద్దతు ఇలాగే ఉండాలని వారు కోరుకుంటున్నారు.
