“2BHK మోసగాళ్లకు ఆల్వాల్ పోలీసుల చెక్.. 79 నకిలీ సర్టిఫికెట్లు స్వాధీనం: డీసీపీ శ్రీధర్”
మేడ్చల్ మల్కాజిగిరి జిల్లా : మల్కాజిగిరి పోలీస్ కమిషనరేట్ పరిధిలో ప్రభుత్వ 2BHK గృహాల కేటాయింపు పేరుతో అమాయక ప్రజలను మోసం చేస్తున్న ముఠాను ఆల్వాల్ పోలీసులు ఛేదించారని డీసీపీ. శ్రీధర్ వెల్లడించారు.
ఈ కేసులో ముగ్గురు నిందితులను అరెస్ట్ చేసి వారి వద్ద నుంచి 79 నకిలీ 2BHK అలాట్మెంట్ సర్టిఫికెట్లు, నేరానికి ఉపయోగించిన మూడు మొబైల్ ఫోన్లను స్వాధీనం చేసుకున్నట్లు తెలిపారు.
డీసీపీ వివరాల ప్రకారం, నిందితులు పేదలు, ఆర్థికంగా వెనుకబడిన కుటుంబాలను లక్ష్యంగా చేసుకుని ప్రభుత్వ 2BHK ఇళ్లు ఖచ్చితంగా ఇప్పిస్తామని నమ్మించారు.
ఇందులో నిందితురాలు తిమ్మిరి గోపినాథ్ పుష్పలత తాను జీహెచ్ఎంసీలో ఉన్నత స్థాయిలో పనిచేస్తున్నానని చెప్పి బాధితుల విశ్వాసాన్ని పొందింది. ఆ తర్వాత ఒక్కో వ్యక్తి నుంచి రూ.50 వేల నుంచి రూ.1 లక్ష వరకు ప్రాసెసింగ్ ఫీజుల పేరుతో డబ్బులు వసూలు చేశారు. బాధితులకు ప్రభుత్వ పత్రాల మాదిరిగా తయారు చేసిన నకిలీ అలాట్మెంట్ సర్టిఫికెట్లు అందజేసి ఇళ్ల కేటాయింపు పూర్తైందని నమ్మించారు.
దాదాపు మూడేళ్ల పాటు ఇళ్ల కోసం ఎదురుచూసిన బాధితులు చివరకు మోసపోయినట్లు గుర్తించి పోలీసులను ఆశ్రయించారు. గోగికార్ ప్రసాద్ ఇచ్చిన ఫిర్యాదు మేరకు ఆల్వాల్ పోలీస్ స్టేషన్లో క్రైమ్ నంబర్ 489/2026 కింద కేసు నమోదు చేసి దర్యాప్తు ప్రారంభించారు.
విచారణలో కీలక ఆధారాలు సేకరించిన పోలీసులు జూన్ 24న తిమ్మిరి గోపినాథ్ పుష్పలత (54), తిమ్మిరి గోపినాథ్ విశాల్ (21), మహేందర్ సింగ్ (45)లను అదుపులోకి తీసుకున్నారు. అనంతరం వారిని న్యాయస్థానంలో హాజరుపరచగా జ్యుడీషియల్ రిమాండ్కు తరలించారు.
దర్యాప్తులో పుష్పలత, విశాల్ నకిలీ 2BHK అలాట్మెంట్ సర్టిఫికెట్ల తయారీ, పంపిణీలో కీలక పాత్ర పోషించినట్లు తేలింది. తిరుమలగిరిలోని రాధాస్వామి జిరాక్స్ సెంటర్ నిర్వాహకుడు మహేందర్ సింగ్ ఆ నకిలీ పత్రాల డిజైనింగ్, ప్రింటింగ్లో సహకరించినట్లు పోలీసులు గుర్తించారు.
ఈ కేసులో ప్రధాన నిందితుడు జయరాజ్ గంగాధరన్తో పాటు నిషా రాజ్, చింటు రాజ్, రాజ్ అండ్ కో. రబ్బర్ స్టాంప్స్కు చెందిన మరో వ్యక్తి ప్రస్తుతం పరారీలో ఉన్నారని డీసీపీ తెలిపారు. వారిని పట్టుకునేందుకు ప్రత్యేక బృందాలు గాలిస్తున్నాయని పేర్కొన్నారు.
డీసీపీ. శ్రీధర్ ఐపీఎస్ పర్యవేక్షణలో, అదనపు డీసీపీ మల్కాజిగిరి, ఏసీపీ బేగంపేట్ డివిజన్ మార్గదర్శకత్వంలో ఆల్వాల్ పోలీస్ స్టేషన్ డిటెక్టివ్ ఇన్స్పెక్టర్ కె. వీరబాబు, డిటెక్టివ్ సబ్ ఇన్స్పెక్టర్ కె. చంద్రశేఖర్తో పాటు పోలీసు సిబ్బంది సమన్వయంతో ఈ కేసును ఛేదించారు. నిందితులను గుర్తించి అరెస్ట్ చేయడంలో దర్యాప్తు బృందం చూపిన చొరవను అధికారులు అభినందించారు.
ఈ సందర్భంగా ప్రజలకు డీసీపీ శ్రీధర్ కీలక సూచనలు చేశారు. ప్రభుత్వ 2BHK ఇళ్లు, ప్రభుత్వ ఉద్యోగాలు, భూ కేటాయింపులు, పెన్షన్లు లేదా ఇతర సంక్షేమ పథకాల పేరుతో డబ్బులు డిమాండ్ చేసే వ్యక్తులను ఎట్టి పరిస్థితుల్లోనూ నమ్మవద్దని హెచ్చరించారు. అలాంటి హామీలు ఇచ్చే వారి వివరాలను సంబంధిత ప్రభుత్వ శాఖల వద్ద తప్పనిసరిగా ధృవీకరించుకోవాలని సూచించారు.
ఎవరైనా అనుమానాస్పదంగా వ్యవహరిస్తే వెంటనే సమీప పోలీస్ స్టేషన్కు లేదా 100, 112 అత్యవసర నంబర్లకు సమాచారం అందించాలని కోరారు.
#Sidhumaroju
Alwal
