సీతారామ ప్రాజెక్టు కాలువ బ్రిడ్జి వద్ద ఘటన.. రైతుకు ఆర్థిక నష్టం
ఇస్లావత్‌ నరసింహ అక్టోబర్ 13 2026: ఏన్కూరు మండల పరిధిలోని భగవాన్ నాయక్ తండా నుంచి రేపల్లెవాడ గ్రామాల మధ్య ఉన్న సీతారామ ప్రాజెక్టు కాలువ బ్రిడ్జి వద్ద పాడి గేదె కాలువలో పడి మృతి చెందింది. ఈ ఘటనలో హిమామ్‌నగర్ గ్రామానికి చెందిన రైతు గేదెను కోల్పోయి ఆర్థికంగా నష్టపోయాడు.
వివరాల్లోకి వెళ్తే.. రైతుకు చెందిన పాడి గేదె కాలువ గట్టుపై మేత మేస్తుండగా ప్రమాదవశాత్తూ కాలువలో పడిపోయింది. నీటి ప్రవాహం అధికంగా ఉండటంతో గేదె కొట్టుకుపోతూ కాలువకు అడ్డంగా ఉన్న నల్ల పైపునకు చిక్కుకుంది. గేదెను బయటకు తీసేందుకు ప్రయత్నించినప్పటికీ నీటి ప్రవాహం కారణంగా సాధ్యం కాలేదు. చివరకు గేదె మృతి చెందింది.
పరిహారం కోసం రైతు ఎదురుచూపులు
పాడి పశువులపై ఆధారపడి జీవించే రైతులకు పశువుల మృతి ఆర్థికంగా నష్టాన్ని కలిగిస్తుంది. ఈ ఘటన జరిగి సుమారు 24 గంటలు గడిచినా సంబంధిత కాలువ యాజమాన్యం స్పందించలేదని సమాచారం.
సంబంధిత అధికారులు ఘటనపై విచారణ చేపట్టి, ప్రమాదానికి గల కారణాలను పరిశీలించాలని స్థానికులు కోరుతున్నారు. కాలువకు అడ్డంగా ఉన్న పైపులు, ఇతర ప్రమాదకర ప్రాంతాలను తనిఖీ చేసి అవసరమైన భద్రతా చర్యలు చేపట్టాలని సూచిస్తున్నారు. బాధిత రైతుకు జరిగిన నష్టాన్ని అంచనా వేసి, నిబంధనల ప్రకారం పరిహారం అందించే అవకాశాలను పరిశీలించాలని కోరుతున్నారు.
