స్వతంత్ర బరిలోకి డాక్టర్ దువ్వాడ శ్రీజ, దువ్వాడ శ్రీకాంత్
పలాస, ప్రతినిధి: పలాస-కాశీబుగ్గ పురపాలక సంఘం ఎన్నికల నేపథ్యంలో రాజకీయ సమీకరణాలు వేగంగా మారుతున్నాయి. తెలుగుదేశం పార్టీ సీనియర్ నాయకుడు దువ్వాడ శ్రీకాంత్ కుమార్తె డాక్టర్ దువ్వాడ శ్రీజ మున్సిపల్ చైర్‌పర్సన్ పదవికి స్వతంత్ర అభ్యర్థిగా పోటీ చేస్తున్నట్లు ప్రకటించడం స్థానిక రాజకీయాల్లో చర్చనీయాంశంగా మారింది. అదే సమయంలో దువ్వాడ శ్రీకాంత్ కూడా 20వ వార్డు కౌన్సిలర్ అభ్యర్థిగా స్వతంత్రంగా బరిలోకి దిగుతున్నారు.
టీడీపీ తరఫున ఆశించిన టికెట్ దక్కకపోవడంతో మనస్తాపానికి గురైన వీరిద్దరూ స్వతంత్ర అభ్యర్థులుగా నామినేషన్లు దాఖలు చేశారు. అనంతరం ఏర్పాటు చేసిన విలేకరుల సమావేశంలో తమ నిర్ణయానికి గల కారణాలను వెల్లడించారు.
డాక్టర్ దువ్వాడ శ్రీజ మాట్లాడుతూ, గత కొన్నేళ్లుగా తన తండ్రితో కలిసి పార్టీ కార్యకలాపాల్లో చురుకుగా పాల్గొన్నట్లు తెలిపారు. అనివార్య పరిస్థితుల కారణంగా స్వతంత్రంగా పోటీ చేయాల్సి వస్తోందని పేర్కొన్నారు. తండ్రి అడుగుజాడల్లో నడుస్తూ నిజాయితీ, విలువలకు కట్టుబడి ప్రజాసేవే లక్ష్యంగా పనిచేస్తానని అన్నారు. తనకు సేవ చేసే అవకాశం కల్పించి ఆశీర్వదించాలని ప్రజలను కోరారు.
దువ్వాడ శ్రీకాంత్ మాట్లాడుతూ భావోద్వేగానికి లోనయ్యారు. పలాస-కాశీబుగ్గ మున్సిపాలిటీ ఆవిర్భావం నుంచి దాదాపు మూడు దశాబ్దాలుగా ప్రజాసేవలో కొనసాగుతున్నానని తెలిపారు. పార్టీ కోసం అంకితభావంతో పనిచేసి రాష్ట్ర స్థాయి నాయకుల ప్రశంసలు పొందినా, కీలక సమయంలో టికెట్ నిరాకరించడం బాధ కలిగించిందని అన్నారు.
తాను ఎన్నడూ పార్టీ వ్యతిరేక కార్యకలాపాలకు పాల్పడలేదని స్పష్టం చేసిన ఆయన, శ్రేయోభిలాషులు మరియు స్థానిక ప్రజల అభిప్రాయాలను పరిగణనలోకి తీసుకున్న తరువాతే ఈ నిర్ణయం తీసుకున్నట్లు వివరించారు. తన కుమార్తె డాక్టర్ శ్రీజను చైర్‌పర్సన్ అభ్యర్థిగా, తాను 20వ వార్డు కౌన్సిలర్ అభ్యర్థిగా స్వతంత్రంగా పోటీ చేయాలని నిర్ణయించినట్లు వెల్లడించారు.
ఎన్నికల అధికారులు గుర్తు కేటాయించిన వెంటనే ప్రజల ముందుకు వెళ్లి తమ అజెండాను విస్తృతంగా వివరిస్తామని ఆయన తెలిపారు. దువ్వాడ కుటుంబం స్వతంత్ర బరిలోకి దిగడంతో పలాస మున్సిపల్ ఎన్నికల పోరు మరింత ఉత్కంఠభరితంగా మారిందని రాజకీయ పరిశీలకులు అభిప్రాయపడుతున్నారు.
