● రూ.538 కోట్ల మనీలాండరింగ్ కేసులో పేరు ఉందంటూ బెదిరింపులు
● సీబీఐ, సైబరాబాద్ క్రైమ్ బ్రాంచ్ అధికారులమంటూ నకిలీ పరిచయాలు
● వీడియో కాల్స్‌తో నిర్బంధించి మూడు బ్యాంకు ఖాతాల నుంచి నగదు బదిలీ
అల్వాల్, నవంబర్ 8:డిజిటల్ అరెస్ట్ పేరుతో సైబర్ నేరగాళ్లు ఓ వృద్ధుడిని భయభ్రాంతులకు గురిచేసి ఏకంగా రూ.87,73,900 కాజేశారు. ఓల్డ్ అల్వాల్‌లోని సాయినగర్ కాలనీకి చెందిన అట్లెళ్ల రాజయ్య హరిబాబు (76) అనే రిటైర్డ్ ఉద్యోగి ఈ మోసానికి బలయ్యారు.
గత సెప్టెంబర్ 11న బాధితుడికి ఫోన్ చేసిన కొందరు వ్యక్తులు తాము విజయ్ కుమార్, వినయ్ మోహన్ అని పరిచయం చేసుకున్నారు. సైబరాబాద్ క్రైమ్ బ్రాంచ్, సీబీఐ అధికారులమంటూ నమ్మించారు. జెట్ ఎయిర్‌వేస్ వ్యవస్థాపకుడు నరేష్ గోయల్‌కు సంబంధించిన రూ.538 కోట్ల మనీలాండరింగ్ కేసులో బాధితుడి పేరు ఉందని ఆరోపించారు.
వీడియో కాల్స్‌తో భయాందోళనలు
న్యాయమూర్తులమంటూ వీడియో కాల్స్ చేసిన నిందితులు 24 గంటల పాటు వీడియో కాల్‌లోనే ఉండాలని, ఇంటి నుంచి బయటకు వెళ్లకూడదని, కుటుంబ సభ్యులకు సైతం ఈ విషయం వెల్లడించకూడదని హెచ్చరించారు. సుప్రీంకోర్టు ఉత్తర్వులు ఉన్నాయని, కోర్టు ఆదేశాల ప్రకారం డబ్బులు చెల్లించకపోతే తీవ్ర పరిణామాలు ఎదుర్కోవాల్సి వస్తుందని బెదిరించారు.
నిందితుల మాటలు నమ్మిన హరిబాబు తీవ్ర భయాందోళనకు గురయ్యారు. వారు సూచించిన బ్యాంకు ఖాతాలకు తన వద్ద ఉన్న నగదును ఆర్టీజీఎస్ ద్వారా బదిలీ చేశారు.
మూడు ఖాతాల నుంచి రూ.87.73 లక్షలు
బాధితుడి కెనరా బ్యాంకు ఖాతా నుంచి రూ.50,12,000, హెచ్‌డీఎఫ్‌సీ బ్యాంకు ఖాతా నుంచి రూ.13,56,500, ఆయన భార్య బ్యాంకు ఖాతా నుంచి రూ.24,05,400 నిందితులు సూచించిన ఖాతాలకు బదిలీ అయ్యాయి. ఇలా మొత్తం రూ.87,73,900 చేతులు మారాయి.
అంత పెద్ద మొత్తంలో నగదు బదిలీ చేసిన అనంతరం తాను సైబర్ నేరగాళ్ల చేతిలో మోసపోయినట్లు బాధితుడు గుర్తించారు. అనంతరం పోలీసులను ఆశ్రయించి ఫిర్యాదు చేశారు. బాధితుడి ఫిర్యాదు మేరకు పోలీసులు కేసు నమోదు చేసి దర్యాప్తు చేపట్టారు.
విచారణ సంస్థల అధికారులమంటూ ఫోన్ చేసి, వీడియో కాల్స్ ద్వారా భయపెట్టి డబ్బులు వసూలు చేసే డిజిటల్ అరెస్ట్ మోసాల పట్ల ప్రజలు అప్రమత్తంగా ఉండాలని పోలీసులు సూచిస్తున్నారు. ఏ దర్యాప్తు సంస్థ కూడా వీడియో కాల్ ద్వారా ఎవరినీ డిజిటల్ అరెస్ట్ చేయదు, కేసు నుంచి బయటపడేందుకు వ్యక్తిగత బ్యాంకు ఖాతాలకు డబ్బులు బదిలీ చేయాలని కోరదు.
#Sidhumaroju
Alwal
