మేడ్చల్ మల్కాజ్గిరి జిల్లా : నిబంధనలకు విరుద్ధంగా నెంబర్ ప్లేట్లు పెట్టుకుని రోడ్లపై కేరాఫ్ అడ్రస్ లేకుండా తిరుగుతున్న వాహనదారులకు మల్కాజ్గిరి పోలీసులు గట్టి షాక్ ఇచ్చారు. మల్కాజ్గిరి ట్రాఫిక్ జోన్-1 పరిధిలో మంగళవారం నిర్వహించిన భారీ స్పెషల్ డ్రైవ్లో అడ్డగోలుగా వ్యవహరిస్తున్న వారిపై పోలీసులు కొరడా ఝులిపించారు.
డిసిపి ట్రాఫిక్ శ్రీ కె. రాహుల్ రెడ్డి ప్రత్యక్ష పర్యవేక్షణలో జరిగిన ఈ ఆపరేషన్లో తిరుమలగిరి మరియు మల్కాజ్గిరి డివిజన్లలోని ప్రధాన జంక్షన్ల వద్ద పోలీసులు వాహనాలను జల్లెడ పట్టారు.
ముఖ్యంగా ఫ్యాన్సీ నెంబర్లు, నెంబర్ ప్లేట్లను ట్యాంపర్ చేయడం, అంకెలు సరిగ్గా కనిపించకుండా అస్పష్టంగా రాయడం వంటి ఉల్లంఘనలపై పోలీసులు ప్రత్యేక దృష్టి సారించారు.
ఈ ఒక్క రోజే ఏకంగా 450 కేసులు నమోదు చేయడమే కాకుండా, వాహనదారులకు 80 వేల రూపాయల భారీ జరిమానా విధించారు. ఇక నిబంధనలను బేఖాతరు చేస్తూ పదే పదే తప్పులు చేస్తున్న వారు మరియు అసలు నెంబర్ ప్లేటే లేకుండా వాహనాలు నడుపుతున్న 66 మందిపై పోలీసులు నేరుగా ఛార్జ్షీట్లు దాఖలు చేయడం సంచలనంగా మారింది. ఇలాంటి వారిని నేరుగా కోర్టులో ప్రవేశపెట్టి కఠిన శిక్షలు పడేలా చూస్తామని పోలీసు యంత్రాంగం హెచ్చరించింది.
కేవలం ప్రభుత్వ గుర్తింపు పొందిన హై సెక్యూరిటీ రిజిస్ట్రేషన్ ప్లేట్లు (HSRP) మాత్రమే వాడాలని, అక్షరాల సైజు మరియు స్పష్టతలో ఎలాంటి మార్పులు చేసినా అది చట్టరీత్యా నేరమని పోలీసులు స్పష్టం చేశారు. నేరాలు జరిగినప్పుడు వాహనాలను గుర్తించడం కష్టతరం కావడంతోనే ఈ కఠిన నిర్ణయాలు తీసుకుంటున్నట్లు తెలిపారు.
వాహనదారులు తమ వాహనాలకు ఉన్న అక్రమ నెంబర్ ప్లేట్లను వెంటనే తొలగించుకోవాలని, లేనిపక్షంలో చర్యలు మరింత తీవ్రంగా ఉంటాయని హెచ్చరించారు. ఇకపై ఇలాంటి మెరుపు దాడులు నిరంతరం కొనసాగుతాయని మల్కాజ్గిరి పోలీస్ కమిషనరేట్ వెల్లడించింది.
#sidhumaroju
