– తెలుగు రాష్ట్రాల నుంచి తరలివచ్చిన భక్తులు.. భక్తిశ్రద్ధలతో ప్రత్యేక పూజలు
భద్రాచలం “భద్రాద్రి శ్రీ సీతారామచంద్రస్వామి దేవస్థానంలో శ్రావణ శుక్రవారం సందర్భంగా అమ్మవారికి కుంకుమ పూజలు ఘనంగా నిర్వహించారు. ఆలయ ప్రాంగణం భక్తులతో కిటకిటలాడింది. తెలుగు రాష్ట్రాల నలుమూలల నుంచి పెద్ద సంఖ్యలో తరలివచ్చిన మహిళా భక్తులు కుంకుమ పూజల్లో భక్తిశ్రద్ధలతో పాల్గొన్నారు.
శ్రావణ శుక్రవారం ప్రత్యేకతను పురస్కరించుకుని ఆలయ అర్చకులు అమ్మవారికి విశేష అలంకరణలు చేసి ప్రత్యేక పూజా కార్యక్రమాలు నిర్వహించారు. అనంతరం మహిళా భక్తులు సామూహికంగా కుంకుమ పూజలు నిర్వహించి అమ్మవారిని దర్శించుకున్నారు. మంగళకరమైన శ్రావణ మాసంలో అమ్మవారికి కుంకుమ సమర్పించి పూజలు చేస్తే కుటుంబంలో సుఖసంతోషాలు, ఐశ్వర్యం, సౌభాగ్యం కలుగుతాయని భక్తుల విశ్వాసం.కుంకుమ పూజల సందర్భంగా ఆలయంలో ఆధ్యాత్మిక వాతావరణం నెలకొంది. భక్తుల రాకతో ఆలయ పరిసరాలు సందడిగా మారాయి. భక్తులకు ఎలాంటి ఇబ్బందులు కలగకుండా దేవస్థానం అధికారులు ఏర్పాట్లు చేపట్టారు. ప్రత్యేక పూజలు, అమ్మవారి దర్శనం కోసం వచ్చిన భక్తులు స్వామివారి ఆశీస్సులు పొందుతూ ఆధ్యాత్మిక ఆనందాన్ని ఆస్వాదించారు.
