పిడుగు శబ్దానికి ఉలిక్కిపడి ఇద్దరు వృద్ధ మహిళలు మృతి
పల్నాడు జిల్లాలో విషాద ఘటన చోటుచేసుకుంది. నరసరావుపేట మండల పరిధిలోని వేర్వేరు గ్రామాల్లో పిడుగుల గర్జనకు భయాందోళనకు గురైన ఇద్దరు వృద్ధ మహిళలు గుండెపోటుతో మృతి చెందినట్లు కుటుంబ సభ్యులు తెలిపారు. ఈ ఘటన స్థానికంగా తీవ్ర విషాదాన్ని నింపింది.
శనివారం రాత్రి నరసరావుపేట పరిసర ప్రాంతాల్లో ఉరుములు, మెరుపులతో కూడిన భారీ వర్షం కురిసింది. ఈ సమయంలో పిడుగుల గర్జనతో పెద్ద శబ్దాలు వినిపించాయి. పెట్లూరివారిపాలెం గ్రామానికి చెందిన తల్లపనేని నాగమ్మ (63) భారీ పిడుగు శబ్దానికి ఒక్కసారిగా ఉలిక్కిపడ్డారు. తీవ్ర భయాందోళనకు గురైన ఆమెకు వెంటనే గుండెపోటు రావడంతో అక్కడికక్కడే కుప్పకూలి మృతి చెందినట్లు కుటుంబ సభ్యులు వెల్లడించారు.
ఇదే సమయంలో సమీపంలోని లక్ష్మీపురం గ్రామంలో మరో విషాద ఘటన జరిగింది. మేకల వెంకాయమ్మ (60) కూడా పిడుగుల గర్జనకు తీవ్రంగా భయపడ్డారు. ఆ తర్వాత ఆమెకు గుండెపోటు రావడంతో ప్రాణాలు కోల్పోయినట్లు కుటుంబ సభ్యులు తెలిపారు.
ఒకే రాత్రి వేర్వేరు గ్రామాల్లో ఇద్దరు వృద్ధ మహిళలు మృతి చెందడంతో ఆయా గ్రామాల్లో విషాద ఛాయలు అలుముకున్నాయి. మృతుల కుటుంబ సభ్యులు కన్నీరుమున్నీరుగా విలపిస్తున్నారు. పిడుగులు, ఉరుములతో కూడిన వర్షాల సమయంలో ప్రజలు అప్రమత్తంగా ఉండాలని, ముఖ్యంగా వృద్ధులు, చిన్నారులు జాగ్రత్తలు తీసుకోవాలని స్థానికులు సూచిస్తున్నారు.
