వేసవి సెలవులు, వారాంతం కావడంతో తిరుమల శ్రీవారి క్షేత్రానికి భక్తులు పోటెత్తారు. రద్దీ అనూహ్యంగా పెరగడంతో వైకుంఠం క్యూ కాంప్లెక్స్, నారాయణగిరి షెడ్లు పూర్తిగా నిండిపోయాయి. దీంతో క్యూలైన్లు వెలుపల ఉన్న బాట గంగమ్మ ఆలయం వరకు పొడిగించారు. టోకెన్లు లేని భక్తులకు సర్వదర్శనానికి దాదాపు 24 నుండి 30 గంటల సమయం పడుతోంది.
మే 23 శనివారం ఒక్కరోజే రికార్డు స్థాయిలో 97,561 మంది భక్తులు స్వామివారిని దర్శించుకోగా, రూ. 3.76 కోట్ల హుండీ ఆదాయం వచ్చింది. క్యూలైన్లలో వేచి ఉన్న భక్తులకు టీటీడీ (TTD) అధికారులు తాగునీరు, అల్పాహార సౌకర్యాలు కల్పిస్తున్నారు.
