🟢ప్రభుత్వాలు మారుతున్నా బాధితుల తలరాతలు మారడం లేదు
నందిగామ, సెప్టెంబర్ 27 bharat aawaz :
నందిగామ పట్టణంలోని కాకతీయ నగర్లో ఉన్న కాకతీయ అపోలో విద్యాసంస్థల ఆవరణలో ఆదివారం సాయంత్రం ఇనాం పట్టాదారుల హక్కుల పోరాట సమితి సమావేశం నిర్వహించారు. ఈ సందర్భంగా సమితి సభ్యులు మాట్లాడుతూ.. ప్రభుత్వాలు మారుతున్నా ఇనాం భూముల బాధితుల సమస్యలు మాత్రం పరిష్కారం కావడం లేదని ఆవేదన వ్యక్తం చేశారు.
🟢ఉద్యమాలు చేస్తున్నా పరిష్కారం ఏదీ?
ఇనాం భూముల సమస్యల పరిష్కారం కోసం పలు గ్రామాల్లో ఉద్యమాలు, నిరాహార దీక్షలు చేపడుతున్నప్పటికీ ప్రభుత్వం సమస్య పరిష్కారంలో జాప్యం చేస్తోందని సభ్యులు పేర్కొన్నారు. దీర్ఘకాలంగా సమస్య పరిష్కారం కాకపోవడంతో బాధితులు ఆర్థిక ఇబ్బందులు ఎదుర్కొంటున్నారని తెలిపారు.
🟢అప్పుల ఊబిలో బాధిత కుటుంబాలు
ఇనాం భూములకు సంబంధించిన సమస్యల కారణంగా భూములను పూర్తిస్థాయిలో వినియోగించుకోలేక, విక్రయించలేక పలువురు అప్పుల ఊబిలో చిక్కుకున్నారని సమావేశంలో వాపోయారు. కొందరి కుటుంబాలు తీవ్ర ఆర్థిక ఇబ్బందులు ఎదుర్కొంటున్నాయని తెలిపారు.
🟢 రాటకొండ సేవలను గుర్తు చేసుకున్న సభ్యులు
ఇనాం భూముల పరిష్కారం కోసం ఎంతోకాలంగా కృషి చేస్తున్న రైతు సంఘం రాష్ట్ర నాయకుడు రాటకొండ రామ్కోటేశ్వరరావు కొద్దిరోజులుగా అనారోగ్యంతో చికిత్స పొందుతున్నారని సభ్యులు తెలిపారు. ఇనాం భూముల సమస్య పరిష్కారం కోసం ఆయన చేసిన కృషిని కొనియాడుతూ, ఆయన ఆరోగ్యం త్వరగా మెరుగుపడాలని ఆకాంక్షించారు.
🟢ప్రజా పరిష్కార వేదికలో అర్జీలు
ఇనాం భూముల సమస్యల పరిష్కారం కోసం పలువురు మంత్రులు, ఎంపీలతో పాటు రెవెన్యూ మంత్రిని కలిసి సమస్యను పరిష్కరించాలని కోరినట్లు సమావేశంలో తెలిపారు. దశలవారీగా ప్రజా పరిష్కార వేదికలో అర్జీలు అందజేసి సమస్య పరిష్కారం కోసం ఉద్యమాన్ని కొనసాగించాలని సమావేశంలో తీర్మానించారు.
ఈ సమావేశంలో ఇనాం పట్టాదారుల హక్కుల పోరాట సమితి సభ్యులు కాపా రవీంద్రనాథ్, గింజుపల్లి రమేష్, సీహెచ్ ప్రసాద్, అచ్యుతరామయ్య, రాటకొండ సుధాకర్, జవ్వాది శ్రీనివాసరావు, మహమ్మద్ గచూమియా చంద్ర తదితరులు పాల్గొన్నారు.
