● నవంబర్ 14న హైదరాబాద్‌కు రాహుల్ గాంధీ రాక
● ఆరు గ్యారంటీల అమలుపై కాంగ్రెస్ ప్రభుత్వాన్ని నిలదీత
● భారత్ సమ్మిట్‌కు హాజరుకాకుండా అడ్డుకుంటామని హెచ్చరిక
అల్వాల్, నవంబర్ 9:తెలంగాణలో కాంగ్రెస్, బీజేపీ మధ్య రాజకీయ పోరు మరోసారి తెరపైకి వచ్చింది. కాంగ్రెస్ అగ్రనేత రాహుల్ గాంధీ నవంబర్ 14న హైదరాబాద్‌లో జరిగే భారత్ సమ్మిట్‌కు హాజరయ్యేందుకు వస్తున్న నేపథ్యంలో ఆయన పర్యటనను అడ్డుకుంటామని బీజేపీ రాష్ట్ర అధ్యక్షుడు ఎన్. రామచందర్‌రావు ప్రకటించారు. నల్లజెండాలతో నిరసన చేపడతామని, సమ్మిట్‌కు హాజరుకాకుండా అడ్డుకుంటామని స్పష్టం చేశారు.
● ఆరు గ్యారంటీలపై నిలదీత
తెలంగాణ అసెంబ్లీ ఎన్నికల ప్రచార సమయంలో రాహుల్ గాంధీ ప్రజలకు ఆరు గ్యారంటీలు ఇచ్చారని రామచందర్‌రావు గుర్తుచేశారు. కాంగ్రెస్ ప్రభుత్వం అధికారంలోకి వచ్చి మూడేళ్లు కావస్తున్నా ఒక్క హామీని కూడా పూర్తిస్థాయిలో అమలు చేయలేదని ఆరోపించారు. ముఖ్యమంత్రి రేవంత్‌రెడ్డి ప్రభుత్వం ఎన్నికల సమయంలో ఇచ్చిన హామీలను నెరవేర్చడంలో విఫలమైందని విమర్శించారు.
● తెలంగాణకు వచ్చే నైతిక హక్కు లేదంటూ వ్యాఖ్యలు
ఎన్నికల సమయంలో ప్రజలకు ఇచ్చిన హామీలను అమలు చేయకుండా తెలంగాణలో కార్యక్రమాలకు హాజరయ్యే నైతిక హక్కు కాంగ్రెస్ నాయకత్వానికి లేదని రామచందర్‌రావు వ్యాఖ్యానించారు. హామీల అమలుపై ప్రజలకు సమాధానం చెప్పాలని డిమాండ్ చేశారు.
● నల్లజెండాలతో నిరసనకు సిద్ధం
నవంబర్ 14న రాహుల్ గాంధీ హైదరాబాద్‌కు వస్తే బీజేపీ శ్రేణులు నల్లజెండాలతో నిరసన తెలుపుతాయని ప్రకటించారు. భారత్ సమ్మిట్‌లో ఆయన పాల్గొనకుండా అడ్డుకుంటామని హెచ్చరించారు.
రాహుల్ పర్యటన నేపథ్యంలో బీజేపీ ప్రకటించిన నిరసన రాష్ట్ర రాజకీయాల్లో చర్చనీయాంశంగా మారింది.
#Sidhumaroju
Alwal
