“భూ యాజమాన్య వివాదంతో స్టేటస్ కో.. తాత్కాలికంగా నిలిచిన నిర్మాణ పనులు”
హైదరాబాద్ జులై 13: తెలంగాణ ప్రభుత్వ ప్రతిష్ఠాత్మక ప్రాజెక్టుల్లో ఒకటిగా భావిస్తున్న సైబరాబాద్ మున్సిపల్ కార్పొరేషన్ (CMC) ప్రధాన కార్యాలయ భవన నిర్మాణానికి తెలంగాణ హైకోర్టు తాత్కాలిక బ్రేక్ వేసింది.
మియాపూర్ సమీపంలోని ఖానామెట్లో ఈ భవన నిర్మాణానికి కేటాయించిన భూమిపై యాజమాన్య హక్కుల వివాదం నెలకొనడంతో, ఆ స్థలంలో యథాతథ స్థితి (Status Quo) కొనసాగించాలని హైకోర్టు మధ్యంతర ఉత్తర్వులు జారీ చేసింది.
ఇటీవల ముఖ్యమంత్రి ఎ. రేవంత్ రెడ్డి రూ.161 కోట్ల అంచనా వ్యయంతో నిర్మించనున్న సైబరాబాద్ మున్సిపల్ కార్పొరేషన్ ప్రధాన కార్యాలయ భవనానికి శంకుస్థాపన చేశారు. నగర విస్తరణకు అనుగుణంగా ఆధునిక సౌకర్యాలతో ఈ భవనాన్ని నిర్మించాలని ప్రభుత్వం నిర్ణయించింది.
అయితే, భవన నిర్మాణానికి కేటాయించిన భూమిపై తమకు యాజమాన్య హక్కులు ఉన్నాయని పేర్కొంటూ కొందరు హైకోర్టును ఆశ్రయించారు. ఈ పిటిషన్లపై విచారణ జరిపిన న్యాయస్థానం, ప్రభుత్వం తన కౌంటర్ దాఖలు చేసే వరకు ఆ భూమిలో ఎలాంటి మార్పులు చేయరాదని ఆదేశిస్తూ స్టేటస్ కో విధించింది.
దీంతో భవన నిర్మాణ పనులు తాత్కాలికంగా నిలిచిపోయాయి. ఇదే సమయంలో, అవసరమైతే ప్రత్యామ్నాయ స్థలంలో నిర్మాణం చేపట్టే అవకాశాలను అధికారులు పరిశీలిస్తున్నట్లు సమాచారం. అయితే దీనిపై ప్రభుత్వం నుంచి ఇప్పటివరకు ఎలాంటి అధికారిక ప్రకటన వెలువడలేదు.
ఈ వ్యవహారంలో ప్రభుత్వం దాఖలు చేసే కౌంటర్, అలాగే హైకోర్టు తదుపరి విచారణలో వెలువడే ఉత్తర్వులు ప్రాజెక్టు భవిష్యత్తును నిర్ణయించనున్నాయి.
ప్రస్తుతం మాత్రం ముఖ్యమంత్రి శంకుస్థాపన చేసిన ఈ ప్రతిష్ఠాత్మక ప్రాజెక్టు భూ వివాదం కారణంగా న్యాయపరమైన చిక్కుల్లో పడింది.
#Sidhumaroju
