ఆంధ్రప్రదేశ్ ప్రభుత్వం రాష్ట్రంలోని విశ్రాంత ప్రభుత్వ ఉద్యోగులకు తీపి కబురు అందించింది. 70, 75 ఏళ్లు నిండిన పెన్షనర్లకు అందించే అదనపు క్వాంటమ్ ఆఫ్ పెన్షన్ (అదనపు పెన్షన్) శాతాన్ని పెంచుతూ కీలక నిర్ణయం తీసుకుంది. ఈ మేరకు రాష్ట్ర ఆర్థిక శాఖ మంగళవారం ఉత్తర్వులు (జీవో) జారీ చేసింది.
తాజా ఉత్తర్వుల ప్రకారం, 70 ఏళ్లు నిండిన పెన్షనర్లకు ఇచ్చే అదనపు పెన్షన్ను ప్రాథమిక పెన్షన్ (బేసిక్ పెన్షన్)పై 7 శాతం నుంచి 10 శాతానికి పెంచారు. అలాగే, 75 ఏళ్లు పూర్తి చేసుకున్న వారికి ప్రస్తుతం ఉన్న 12 శాతం నుంచి 15 శాతానికి పెంచుతూ నిర్ణయం తీసుకున్నారు. ఈ నూతన రేట్లు 2026 డిసెంబర్ నెల పెన్షన్ నుంచి వర్తించనున్నాయి. పెరిగిన పింఛన్లను 2027 జనవరి 1 నుంచి చెల్లిస్తారని ప్రభుత్వం స్పష్టం చేసింది. కాగా, 80 ఏళ్లు, ఆపైబడిన వారికి ఇచ్చే అదనపు పెన్షన్ రేట్లలో ఎలాంటి మార్పు లేదని పేర్కొంది.
