సికింద్రాబాద్ : వారాసిగూడలో ప్రజల ప్రాణాలతో చెలగాటమాడుతున్న ఒక నకిలీ వైద్యుడి గుట్టును సిటీ పోలీసులు రట్టు చేశారు.
ఎలాంటి కనీస అర్హత లేకుండా క్లినిక్ నడుపుతూ, రోగులకు ఇష్టమొచ్చినట్లు ఇంజక్షన్లు ఇస్తున్న నిందితుడిని వారాసిగూడ పోలీసులు శనివారం అరెస్ట్ చేశారు.
పోలీసుల కథనం ప్రకారం.. భూపాలపల్లి ప్రాంతానికి చెందిన నన్నుట మాధవ్ (42) అనే వ్యక్తి వారాసిగూడలో “మాధవ మెడికల్ షాప్” పేరుతో ఒక కేంద్రాన్ని ఏర్పాటు చేశాడు.
ఇంటర్మీడియట్ కూడా పూర్తి చేయని ఇతనికి వైద్య రంగంలో ఎలాంటి అనుభవం కానీ, ఫార్మసీ అర్హతలు కానీ లేవు. కేవలం సులభంగా ఎక్కువ డబ్బు సంపాదించాలనే దురాశతో, కుంట అర్చన అనే స్నేహితురాలి డ్రగ్ లైసెన్స్ను అడ్డం పెట్టుకుని ఇతను ఇక్కడ చట్టవిరుద్ధంగా డాక్టర్ అవతారమెత్తాడు.
గత ఏడాది కాలంగా డాక్టర్ ప్రిస్క్రిప్షన్ లేకుండానే వచ్చే రోగులందరికీ డిక్లోఫెనాక్ (Diclofenac), టిటి (TT) వంటి ఇంజక్షన్లు ఇస్తూ ప్రాక్టీస్ సాగిస్తున్నాడు.
దీనిపై ఖచ్చితమైన సమాచారం అందుకున్న వారాసిగూడ పోలీసులు పక్కా వ్యూహంతో డెకాయ్ ఆపరేషన్ నిర్వహించారు.
సాధారణ దుస్తుల్లో వెళ్లిన ఓ హెడ్ కానిస్టేబుల్కు నిందితుడు ఇంజక్షన్ ఇవ్వబోతుండగా పోలీసులు రెడ్ హ్యాండెడ్గా పట్టుకున్నారు.
నిందితుడి నుంచి భారీగా ఇంజక్షన్ వైల్స్తో పాటు వ్యాపారానికి వాడుతున్న శామ్సంగ్ మొబైల్ ఫోన్ను స్వాధీనం చేసుకున్నారు.
ఈ ఘటనపై కేసు నమోదు చేసిన పోలీసులు, అర్హత లేకుండా నకిలీ వైద్యం చేస్తూ ప్రజల ప్రాణాలను ప్రమాదంలోకి నెట్టే వారిపై కఠినమైన చట్టపరమైన చర్యలు ఉంటాయని హెచ్చరించారు.
ప్రజలు కూడా తమ ఆరోగ్య విషయాల్లో అప్రమత్తంగా ఉండాలని, కేవలం గుర్తింపు పొందిన రిజిస్టర్డ్ మెడికల్ ప్రాక్టీషనర్లను మాత్రమే సంప్రదించాలని వారాసిగూడ పోలీసులు విజ్ఞప్తి చేశారు.
#Sidhumaroju
