ఎన్టీఆర్ వైద్యసేవ: ప్రైవేటు ఆసుపత్రులకు బకాయిల చెల్లింపు షురూ.

ఆరోగ్యశ్రీ ఆసుపత్రులకు తీరనున్న బకాయిల కష్టాలు

ఎన్టీఆర్ వైద్యసేవ ట్రస్టు పరిధిలోని ప్రైవేటు ఆసుపత్రులకు ఏపీ కూటమి ప్రభుత్వం బకాయిల చెల్లింపు ప్రక్రియను వేగవంతం చేసింది. ‘బిల్ డిస్కౌంటింగ్’ (TBDA) విధానం ద్వారా రూ.1000 కోట్లు విడుదల చేస్తూ, ఇప్పటికే 25 ఆసుపత్రులకు రూ.62 కోట్లు జమ చేసింది.

మొత్తం 873 ఆసుపత్రులకు ఉన్న రూ.2,044 కోట్ల బకాయిల్లో, తొలి విడతగా వెయ్యి కోట్ల చెల్లింపులు జరుగుతున్నాయి. కూటమి ప్రభుత్వం అధికారంలోకి వచ్చాక ఇప్పటివరకు మొత్తం రూ.5,556 కోట్లు విడుదల చేసింది. ఇందులో గత ప్రభుత్వ కాలం నాటి రూ.2,403 కోట్ల బకాయిలు కూడా ఉండటం గమనార్హం. తాజా నిధులతో పేదలకు వైద్య సేవలు మరింత మెరుగుపడనున్నాయి.